تغيير كرسي التسريحه بشكل جذري 😍

مرحبااا اصدقاء اروى

ان شاءالله تكونوا بصحه و عافيه يارب ❤️

بدخل بالموضوع على طول عندي كرسي تسريحه جلد مع الاستخدام و الزمن تقطع و صار شكله مرره خايس و فكرت اشتري غيره بس بعد متابعتي لأروى صرت افكر اغيّر اي شي و كانت التجرربه بما ان الكرسي جداً مريح و عملي قلت احاول اغيّر الشكل .. اعذروني التصوير موش ولا بد

هذا شكل الكرسي قبل ..

صوره قررريبه

واللحين نبدا الشغل

جبت الدريل و فككت رجول الكرسي في دقايق مره كان سهل

جبت الاغراض الي احتاجها :

دباسة خشب من جرير ب 75 ريال  و التعبئه اعتقد ب 14 ريال

شريت القماش الفرو من محل كماليات المتر ب 60 و كان مره كافي نص متر بس اخذت الزياده احتياط و تحصلون القماش بأي مكااان ..

بخاخ معدن فضي ما صورته و كان عندي من اول اشتريته من جرير ما اذكر سعره صراحه ..

هنا مثل ما هو موضح بالصوره فكيت القماش الاسود و كانت اصعب مرحله لانها مدبسه من قلببب 🤓

وقصيت القماش الابيض على مقاس الكرسي ..

هنا صبغت الرجول بالبخاخ الفضي لان كان فيه اجزاء مصدّيه و بالصوره الي على اليسار بعد الصبغ و الي جنبه بدون صبغ للأسف ما ارضاني اللون بس حسيته طلع كأنه جديد

هنا ثبت القماش على الكرسي بطريقه مرتبه .. بالنسبه للشي الاخضر و الاصفر هذا لما شلت القماش الاسود طلع لي الاسفنج و مثبتينه بأحزمه بعد ما ثبت القماش رجعت اضفت القطعه السودا و دبستها بعد و اهم شي لا تنسوون تحددون اماكن فتحات المسامير عشان تقدرون تثبتون الرجول بسهوله ..

و اللحين النتييييجه النهائيه بعد ما ركبت كل شي

تتتترررررررااا 🤣

اعذروني على كثرة الصور لكن حسيتها افضل و اوضح من الكتابه ❤️

وألف شكر لأروى الي اعطتنا فرص نبدع و نشوف ابداعات البنات

و ان شاءالله لي مواضيع ثانيه بما اني مرحله تجديد و نقل و اذا اي احد عنده فكره كيف اصبغ سرير ايكيا الي يكون قشرة خشب يفيدني بلييز ابي اصبغه من بني الى ابيض 🤓

الى اللقاء ❤️

from مدونة أروى http://arwa.cc/7316