تجربتي في السفر مع رضيعة
السلام عليكم و رحمة الله و بركاته
مرحبًا أصدقاء أروى ⭐
أنا منال و موضوعي اليوم للأمهات الخارقات اللي يقررون ياخذون أطفالهم معاهم في السفر 
في هذا الموضوع بحاول أجمع لكم أهم النقاط اللي تعلمتها من تجربتي المتواضعة في السفر مع بنتي
ندى عمرها سنة و شهر و خلال هذي السنة سافرت معي رحلات داخلية و دولية مجموعها ١٤ رحلة “ذهاب و عودة”
يعني أعتقد صرت خبيرة في الموضوع بما فيه الكفاية 
و لكن هذا لا يعني اني مصدر تاخذون منه كل المعلومات، انا بس حابة أذكر ما استفدت لعله يفيدكم
توكلنا على الله ✈
١- و هي أهم أهم أهم نقطة، وسعي صدرك! حتى لو كل شيء صار عكس اللي مخططه له عادي مشّي الموضوع و غيري الخطة لكن لا تتوترين. الطفل يحس بأمه، كل ما توترتي يتوتر معك. توقعي كل شيء و استعدي لكل شيء و تذكري ان هذه الرحلة للاستجمام و خذي كل شيء ببساطة.
٢- حاولوا تحجزون رحلتكم في وقت يناسب طفلكم. مثلًا ندى أكثر وقت تكون رايقه فيه هو الصباح و الحمدلله رحلاتنا كانت أغلبها في هذا الوقت لكن لو صدف و كانت في وقت غير مناسب أحاول اني اخليها ما تنام قبل الرحلة أقل شيء ٤ ساعات عشان تنام وقت الرحلة.
٣- ابدأي في التجهيز للسفر قبله بوقت كافي و ابحثي عن هذي الأسألة ( كيف بيكون الجو هناك؟ – كم المدة اللي بتقعدونها؟ – بناءًا على المدة كم يحتاج طفلك حليب و حفايظ؟ – طفلك يحتاج ملابس دافئة ولا باردة؟ – هل بيكون عندك غسالة ملابس ولا بتاخذين ملابس احتياط؟)
بالنسبة لي كنت اخذ لندى ملابس كثير حتى لو زادت مو مشكلة أهم شيء ما تنقص، و أحيانًا الأطفال يتأثرون بتغير الجو، ندى في المناطق الباردة كان يصيبها إسهال ” و انتوا بكرامة” و كثير ما يتسرب للملابس، فكنت اخذ لها ملابسها الداخلية من محلات الهرم سعرها ٥ ريال فقط و اذا توسخت بالسفر أرميها على طول لأن ما عندي مجال أغسل. و على فكرة خامتها جدًا ممتازة.
٤- قبل الرحلة خذي كفايتك من النوم عشان تكونين مستعده لكل شيء.
٥- فكري جيدًا كيف بتتنقلين مع طفلك في المطار؟ هل بالعربية ولا بالشيالة؟
عن نفسي استخدمت العربية لأني حسيتها أريح لندى بما اننا نروح قبل الرحلة بوقت فأكيد بتحتاج مكان مريح تنام فيه. و غير كذا العربية ساعدتني كثير في حمل الأكياس و شنطة ندى. العربية تدخل معك الين باب الطيارة و من هناك ياخذونها. لكن عيبها الوحيد ان عند كل نقطة تفتيش في المطار لازم تتطبقينها و تدخلينها في الجهاز مع الشنط. نقاط التفتيش أقل شيء تكون ٢ و في المطارات الكبيرة ممكن تكون أكثر. ( نقطة أخرى مهمة في نقاط التفتيش هي “خذي راحتك!” أبدًا لا تضغطين على نفسك و على طفلك و تستعجلين حتى لو لاحظتي ان الناس اللي وراك تضايقوا، هذا دورك و انتِ أم يعني تفتيش عن شخصين من حقك تاخذين راحتك) بالنسبة للشيالة استخدمناها مرة وحدة و ما كان في المطار بس زوجي تعب منها و ما حبها أبدًا.
٦- في أفضل الحالات ممكن يكون جنبك مقعد فاضي. لو ما كان فيه ممكن بعد الإقلاع تسألين المضيفة اذا فيه مقاعد فاضية في الخلف و تقعدين في مقعد و طفلك في مقعد. بترتاحين كثير خصوصًا لو رحلة طويلة. لو ما كان فيه مقعد عادي لا توترين نفسك خذي طفلك في حضنك و ممكن كل شوي تتبادلون انتِ و زوجك.
٧- بعض الأطفال يتأذون من الضغط وقت الإقلاع و الهبوط عشان كذا ينصحون بالرضاعة في هذا الوقت. عن نفسي حرصت على الرضاعة في هذا الوقت لكن احيانًا تكون ندى نايمة و ما اصحيها من نومها و عادي يمر الاقلاع بسلام، و احيانًا هي ترفض ترضع و ما اجبرها. أهم شيء خليك جاهزه للرضاعة في هذا الوقت. و ابدًا لا تخجلين من الرضاعة الطبيعية في الطيارة صدقيني محد ملاحظ.
٨- بالنسبة للأطفال في عمر شهرين ما بيكون لهم حركة كثيرة و غالبًا بينامون أغلب الرحلة. لكن من عمر ٥ شهور بيكونون حركين و يملون من القعده. وحدة من الرحلات كان مقعدي أول مقعد في السياحي عشان كذا كان عندي مساحة قدامي و فرشت لندى و حطيتها في الأرض و انبسطت كثير.ممكن أيضًا تقعدون في المصلى شوي عشان الطفل يلعب و ياخذ راحته. لكن اذا عندكم مقعد للطفل هذا بيكون الحل المثالي.
٩- بالنسبة للفنادق يفضل تعطونهم خبر من وقت الحجز ان معاكم رضيع عشان يجهزون لكم سرير له. بعض الفنادق ما يكون عندهم عشان كذا من الأفضل تعرفون من بدري.
١٠- ابدًا لا تترددين في طلب المساعدة من زوجك. هذه رحلة للعائلة كلها و من حقك تستمتعين. لا تحملين نفسك مسؤولية كل شيء طول الوقت. اي وقت حسيتي انك جدًا مرهقه اطلبي المساعدة من زوجك أو أي شخص مسافر معك.
هذه أهم النقاط اللي تعلمتها
أتمنى أن التدونية تكون أفادتكم و لو بالقليل
و شاركوني تجاربكم اذا سبق لكم السفر مع أطفال أقل من عمر سنة! خلونا نتبادل النصائح و التجارب
شكرًآ لكم و شكرًا أروى ❤
from مدونة أروى http://arwa.cc/7560
