غرفة جديدة !

 

السلام عليكم ورحمة الله وبركاته

كيف نكتب مقدمات ؟ نسيت والله هههههههه

اول شي شكراً لأروى لأنها فتحت لنا هالزاويه الجميله بمدونتها 

احترت كثييييير وين احط صوري فشفت انه انسب واجمل مكان مدونة أروى 

قررت اجدد غرفتي، ولي يمكن سنة ونص ؟ او سنتين ؟ اخطط وافكر ! وكل مره يتغير تفكيري بشي

بالاول كنت مفكره افصل، واخذت قياسات كل شي كل شي، ورحت للنجار وشرحت له بالمتر من الحماس

بس ماربي كتب افصل بوقتها وانشغلت بامور ثانيه وتأجل الموضوع شوي

وكان ببالي يكون اثاث الغرفه ابيض، وسبحان الله كل تأخيره فيها خيره 

 

نبدأ بسم الله

بستعرض لكم صور غرفتي القديمه -طبعاً كانت عندي من يوم كنت برابع/خامس ابتدائي-

وانا الحين بالجامعه يعني لها ١٠ سنين فلذلك هي طفوليه شوي

وهذا الي خلاني مره ابي اغيرها بس كنت اقول حرام يعني اثاثها ماخرب

وبعد مده يعني صبغت جدار مخطط فحسيت بالتجديد ومشيتها

 

 

هنا كانت آخر زاويه للسرير – انا راعية تغيير ترتيب الاثاث بين فتره وفتره-

زوايا مُفضله 

 

كنت احب استخدم البورد حقي كخلفيه للتصوير 

كانت هذي الصورة بعد يوم التنظيف والروقان 

 

يتضح لكم اني مرررررره كنت احب المخطط واستخدمه كخلفيه للتصوير كثيييير 

 

هذي كان ترتيب الغرفه الي قبل الاخير

وداع الغرفه 

جزء صغير مني كان بيشتاق لها وحزين شوي، بس الاكبر الفرحة للأمانه 

 

 

 

والآآآآآآآآآآآآن نبدأ تحضيرات الغرفة الجديدة !!!!

 

استخدمت موقع Polyvore

فكرته جداً سهله، يجمع لك الاثاث/الملابس الي تبغين بصورة وحدة

لكن مو كل قطعه واي شي موجود بالموقع، بس برضو فيه حل ! الي هو ؟

اضافة بمتصفح قوقل كروم اسمها Polyvore Clipper
ساعدتني كثير
بحيث اروح لرابط القطعه الي ابيها واضغط عالايقونة وتظهر لي الصور الموجودة بالصفحه كلها واضيفها
واذا رحت للموقع الاساسي Polyvore لقيتها
وبكذا اروح لأي قطعه (اثاث/اكسسوار…) اي شي واضيف الي ابي عن طريق الاضافة

والموقع فعلاً ساعدني لأني كنت محتاره بكذا محل !

+ انا انسانه مره تكره الاثاث الطقم الطقم الي ملياااااانه اشكاله عندنا !

احب التجميع بس التجميع المرتب الي مو شاذ وكل شي ماشي مع بعضه بشكل حلو

لذلك فعلاً ساعدني

فقعدت اجمع كم صوره واوري صديقاتي ايش احلى ورتب افكاري كثير

يوم جمعت افكاري منه
رحت شيكت عالمحل الي قررت اشتري اغلب الاثاث منه West Elm

وقعدت اتأكد من الألوان قدام عيني لين تطمنت وتوكلت على الله وشريت

وكان ببالي القطعه حقت الكتب مره ابيها بس للأسف مخلصه

الحين انتهينا من السرير / التسريحه / الكومدينه / المكتب (لحاله من Pottery Barn )

باقي دولاب الملابس، وكل المحلين ماكانو يبيعون فلذلك احترت من وين اخذه بحيث يكون ماشي مع الاثاث

مو مختلف كثير، وقع الاختيار على …

 

ايكيا ! لقيت عندهم دولاب واحد نااااسبني جداً وناسب الاثاث !

رتبت الدولاب من الداخل  بالموقع بس عيا يكمل معاي وعلق

واضطريت اروح واعيده من جديد مع موظفه داخل ايكيا

بس اني خلاص حفظت الترتيب فبسرعه خلصت

 

المكتب كنت ابغى له قطعه مثل هذي

قعدت ادور بالرياض وين تنباع ؟ قلت اكيد عند لوازم المحلات وهالاشياء

ولقيتها بالصناعيه، فصلتها على الطول والعرض الي يناسبوني بس ماقدرت اختار اللون :/ بس اسود او ابيض

بس ماعجبني لونها :/ الابيض المخضر هذاك حق المعدن :/ والاسود مافكرت فيه وقتها ماعرف ليش

مره ماعجبني يوم جاني فصبغته ذهبي

 

وكنت احتاج مرايا للتسريحه،كنت مره ابي بيضاويه، درت كثير كثير مالقيت مرايا تعجبني !

+ مره مبالغين باسعار المرايات، وقلت خلاص باخذ جاهزه سااااده ومافيه الا مسطيلات او مربعات

بس اخر قرار صار اني فصلتها الحمدلله زي ما ابي …

 

 

الان يوم خلصت من شراء الاثاث ولوازمهم الاساسيه !

لازم اصبغ قبل لايوصلون لي الاثاث

وقع الاختيار على … 573 جدار واحد، والباقي اوف وايت

امي مره قالت لاااا بتندمين اللون غامق ! ماينفع بيضيق عليك الغرفه

وكمان بعض صديقاتي نفس الشي قالو عالاقل حطي 5041 افتح شوي

وانا عجزت مره ابي اللون وتوكلت على الله وثبتت على كلامي و صبغته

 

تراااااااا

 

 

 

صورة 

 

 

 

 

 

والآآآآآآآآآآآن ……

واخيراً انتهت الغرفه بالكامل الحمدلله  

تعبت فيها كثير TT____TT 

يله سمّو بالله وادخلو من الباب 

 

 

البلونات ترحب بكم -كانت باقيه من حفلة تخرج صديقتي- 

 

 

الاباجورة من ايكيا، القطع المثلثه الي فيها النباتات من موقع Umbra

وموجودة اغلب بضاعتهم بامازون ويوصلون مباشر للسعودية بدون بريد امريكي 

 

التسريحة وتفاصيلها ✨

-المرايا الصغيره عندنا من زمان واستخدمها للعطور-

والاشياء الباقيه “القطعه حقت الاكسسوارات + حقت الفُرشه”من موقع Umbra ، وزي ماقلت يعرض اغلب قطعه بامازون

حقت عود الاذان من امازون كمان، علبة الشموع Home Sweet Home من Nice

 

 

ياخي اضاءة الشمس ياخي ☹️

“الستاره من ايكيا” وللحين ادور حل للشمس كيف اغطيها

مابغى بلاك اوت، وشباك الشتر حلو بس يغلونه علي عشاني شباك واحد

الي عندها حل تعطيني اياه بكون شاكره 

 

الدولاب من ايكيا

 

 

الحمدلله نتيجة المكتب مرررره ارضتني 

الرفوف السوداء من ساكو

 

الغرفة بالظلام

صور بانوراميه

الغرفة محبوبة حتى بالظلام 

والحمدلله تممممممت 

شكراً شهد

شكراً ندو 

شكراً هيفاء 

مدري وش كنت بسوي لو ماساعدوني، كل شوي انط لوحدة

شرايك بكذا ؟ طيب كذا مع كذا ؟؟؟ شكراً كثيييير 

وشكراً لكل من ساعدني 

 

واخيراً لأي استفسارات : اسئليني 

ايضاً تجدوني في :

 

from مدونة أروى http://arwa.cc/5528